Home Rubriche Notizie Cimbre DAR SCHAÜLA BIRBL

DAR SCHAÜLA BIRBL

333

Schaüge! Di beldar, di pèrng. Dar birbl hatt gebèkslt allz. ‘Z sik auz sovl azpe ’z berta gest a kriage, sovl azpe ’z beratnda gesprunk parardja hundartar granàtn.
Lüsan! Ma mage no höaran ‘z bazzar boda rütscht ar pa teldar. ‘Z khinnt vür sovl azpe di natùr berat nå zo gaüla vo bazta iz vürkhennt. Ploaz beldar un pèrng soin nemear azpe bar håmse gedenkht.
Da, atz Lusérn, iz gånt pezzar baz in di andarn lentar vodar hoahebene. Di Pompìarn vo Lusérn håm gearbatet zoa zo halta offe di beng boda vüarn in lånt un håm geholft in sèln vo Slege zo halta offe di Valdassa. Sa soin o gest atz’ Lavròu zo geba a hånt soin kolège. Eppaz ista gest zo tüana nå in tèchar in lånt o ma nètt mearar baz sovl
Atz Lavròu di schade soin gest groaz saiz peng in bint saiz peng in bazzar un in di fratzióng Piccoli 5 famildje håm gemcht vortgian von haus.
Dar naüge vorsitzar vodar Provintz Maurizio Fugatti izzese gevuntet, an erta, atz Lavròu pinn bürgermaister un vorsìtzar vodar Zimbar Hoachebene zoa z’sega di schade un vorstìan bazta håm mengl di ünsar lentar.
in di Sim Kamoüdar di beldar von schraibar M. R. Stern un von Tönle Bintarn soin nemear zo khenna; lai nidar pa Valdassa soinda gevallt mearar baz 500.000 vaüchtn. Da khlumma statt vo Slege iz gestånt åna liacht vor quase a boch un di Protezione Civile, un di Pompìarn, håm getånt daz peste zo helva alln in sèlnen boda håm gehatt mengl.
In da ünsar Provintz di Pompiarn håm gearbatet tage un nacht; lai ka Leve di Pompiarn soin khennt gerüaft 300 vert von laüt. In da gåntz Provintz habar vorlórt 2 mildjü èlbar in 25% ; quase 400 km beng soin khennt gespèrrt un, 60.000 famildje soin gestånt åna liacht.
Dar profesor Dino Zardi, vodar Universitet vo Tria, hatt khött ke dar birbl ka üs iz auzgeprocht o obrómm di Bèlt iz nå zo darbèrmarse. Un, azta ’z mentsch geat vürsnen asò, ena zo haba kunt vodar natur, bazta iz vürkhennt in da vorgånnate boch, mage auzvalln hèrta mearar in di djardar boda khemmen.

 

(Il testo è dell’Istituto Culturale Cimbro)