Home Rubriche Notizie Cimbre DAR TRENTINO VOR DI FAMILDJA: GE-ZOAGET DAR REPORT AFTE POLITEKE VOR DI...

DAR TRENTINO VOR DI FAMILDJA: GE-ZOAGET DAR REPORT AFTE POLITEKE VOR DI FAMILDJE

22

An trèff offe alln in sèlln bosen åizgånt, afte famildje, aftz bia da mang stian un baz ma tüat da ka üs nåzohelva auzolega famildja: ’z iztase gehaltet a tagung online zo zoaga bia ’z khinta vürgetrakk daz provintziàl Gesetz n.1/2011, ’z håmda geredet Carlo Buzzi boda lirnt in Dipartimént vo Sociologia in di Universitét vo Tria, Giovanna Fambri diridjént von Institut vo statistìk vodar autonome Provìntz vo Tria un Luciano Malfer djeneràl diridjént von Åmt vor di famildja.
Di famildja siånka azta bortn hèrta mindar khindar un di sbern zaitn bobar soin drå zo leba peng dar pandemì, un di popolatziong boda dareltart, di djungen hèrta mindar steat allz ummaz no hèrta dar grunt vodar trentinar kamòuschaft. Di date augeroatet siånka azza zoang mearare sachandarn boda soin drå zo bèksla in di famildje, khön o però ke in Trentino ettlane åndre gian kontra in sèll bomen impaitet un boda vürkhemmen atz åndre saitn. Baispil vo bia ’z soinda gemacht di famildje, in Trentino åndarst baz atz åndre saitn, in di lestn zen djar soinda gekhreschart di famildje boda håm drai odar mearar khindar; un no mearar baz halbe di famildje khön z’stiana garècht pitt gèlt un khinta o gezoaget ke, darzuar in gèlt, ’z lem von famildje in ünsarne lentar iz vil gepezzart in di zait.

Azpe ma hatt khött, di famildja iz a kategorì boda hatt gesichart azta halt di kamòuschaft untar dar pandemì o, soinante gest guat zo kheara zo organizarase in khurtza zait vorå in sbern sachandarn boda soin auzgevallt in ditza lest djar un a halbez. Di krisi vodar pandemì, hatt nèt augehaltet di hilfan von politeke vor di famildja bodada soin in ünsarne lentar un boda håm in zil nèt lai auzohalta di famildje bodasan håm mångl, ma mearar baz ndarst zo gebanen struméntn zo helva azzen mang machan a djüstz lem. Atz ditza, dar strategesche plån vürzovüara ’z gesetz 1/2011 iz dar grunt strumént zo macha arbatn an pestn di vüarom.

Di hilfan zuargètt soin zo geba kontra dar demografisch kontratziong, schütz pitt gèlt, leng panåndar lem un arbat, helvan in djungen zo machanen a lem. Dar trentinar sistèm “qualità famiglia” iz uantze in Beleschlånt, ditza ankunto o dar da nètz von famildja Distrikt: da soin mearar baz 900 di organizatziongen boda nemmen toal in lånt welfare, baispil musee, schualn, organizatziongen profit un nèt profit, a teritoriàl pintom boda hatt azpe zil in sèll vürzovüara prodjèkte tschelle vodar famildja. Ma mocht o nèt vorgèzzan in ruòl von trentinar Kamöündar zertifjkàrt “tschelle vodar famildja” boda arbatande in di lentar nemmen å in plån vor di famildje un vüarn vür nètz politike zo geba naüge oportunitét in trentinar famildje.

Nåmp disan soinda di firme ‘family friendly’ un a gåntzar sistèm boda pittar zait izzese inngemacht un hatt gevüart vür ünsar earde, azpe an earde boda gearn ånimp prodjékte vor di famildje un ditza pezzart bia ma khent geschètzt o. Strumentn azpe di sportìf un kulturàl voucher, di schütz vor di dianst un di darkhenn boda khemmen zuargètt in organizatziongen zertifikàrt soin bichtege senjél vonan unantzegen sistém vor di trentinar politeke vor di famildje boda an lestn gebinnt.

Vor di briavan un di slide von tagung:
https://www.trentinofamiglia.it/News-eventi/News/Un-affresco-sulla-famiglia-in-Trentino-e-a-livello-nazionale

Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)