Home Rubriche Notizie Ladine COMUNS, FINANZIÉ I LURIERES DE PRESCIA PER 3,2 MILIONS DE EURO

COMUNS, FINANZIÉ I LURIERES DE PRESCIA PER 3,2 MILIONS DE EURO

15

I lurieres i tol ite i teritories de Borgo d’Anaunia, Dro, Garniga Terme, Imer, Lavis, Pieve Tesino, Samone, Sèn Jan e Telve
L’é de 3 milions 248 mile euro l valor di intervenc de prescia che anché la Jonta provinzièla l’à dezidù de finanzièr, su proponeta de l’assessor ai enc locai.
I é nef I comuns enteressé e autertenc i lurieres: nef marciapié e smaorament de la viabilità sui teritories de Borgo d’Anaunia e Lavis, metuda en segureza de la strèda a Pieve Tesino, lurieres a la rei del bosserlait de Dro, Imer e Samone, intervent a la rei idrica di Garniga Terme, operes de preja su la fontènes a servije de Sèn Jan e neves nices te cortina de Telve.

La Jonta l’à fat fora de finanzièr i lurieres de prescia metan a la leta l fon de resserva. Chisc intervenc i é stac troé fora aldò de la domanes portèdes dant da la aministrazions de comun e dò na ascorta valutazion de ogne situazion. Se trata, più avisa, de chisc intervenc:

– La pruma pèrt di lurieres per fèr sù n nef marciapé uzà per la segureza de chi che va a pe e per smaorèr la strèda che colea Castelfondo e Dovena, tel comun de Borgo d’Anaunia. L toch de strèda che l’é ades l’é dalbon strent, tant per chi che va a pe che i cogn passèr enlongia la ciarejèda, che per i auti che i cogn seghitèr a ferèr (505.750 euro de contribut su na soma de projet de 595 mile euro).

– La restruturazion de la rei del bosserlait del zenter storich de Pietramurata, tel Comun de Dro. L projet l perveit de mudèr fora pèrt de la rei idrica, dal pozet olache vegn tout l’èga al resservar, e pèrt de la rei de distribuzion (413.114,76 euro de contribut su na soma de projet de 630mile euro).

– L comedament de la rei idrica del comun de Garniga Terme. Chesta pruma pèrt di lurieres la revèrda l comedament e la metuda en segureza de la operes de preja, di resservares e na pèrt de la rei de distribuzion del paisc per miorèr l’endrez di impianc se emprevalan de n sistem de telecontrol (488.179,32 euro de contribut su na soma de projet de 600mile euro).

– L prum intervent de comedament de la rei del bosserlait, per meter en esser n nef resservar per l’èga da beiver e contra l mèl da fech tel comun de Imer. L’é stat osservà defat la mencianza de resservares da durèr desche resserva ti momenc de maor consum e tel cajo che crepe fora l fech e la mencianza dreta de stravardament igienich-sanitèr de la operes de preja de la Val Noana (431.485,54 euro de contribut su na soma de projet de 600mile euro).

– Fèr sù n marciapé nef te strèda G. di Vittorio e l coleament con strèda Negrelli tel Comun de Lavis. L projet l perveit de fèr fora de prescia l problem leà a la segureza de la jent a pe che passa te la zona a Ovest del paisc de Lavis. Dal pont de veduda de la viabilità, su chesta area passa scialdi n muie de auti, jent a pe e co la roda ajache chiò se troa n muie de majons, de ìsoles ecologiches, de sacotantes ativitèdes produtives e l ciamp sportif de comun (439.717,46 euro de contribut per na soma de projet de 488.574,95 euro).

– La metuda en segureza de n toch de la Val Malene, tel comun de Pieve Tesino. L projet l perveit de comedèr e – olache l’é de besegn – fèr sù da nef la strutures de seponta da la man de sot de la strèda, slarièr la ciarejèda olache la é massa strenta, meter en esser n sistem per desgorjer l’èga, per poder passèr en segureza, ence con mesi che peisa, anter l paisc de Pieve Tesino e la località Val Malene (459mile euro de contribut su na soma de projet de 510mile euro).

– Fèr sù da nef velch toch del bosserlait de Samone, tel zenter de paisc. La condotes, fates sù ti egn ‘80 no les arsegura l servije de erogazion a dò a dò de l’èga da beiver ajache da spes les é rotes e les pert (244.626,73 euro de contribut su na soma de projet de 300mile euro).

– L’adatament de la operes de preja de la fontènes “Pian de la Pieracia”, “Garneté Neva” e “Garneté Bassa”, estra che meter ite l telecontrol e mudèr fora n toch de condota de la operes de preja “Pian de la Pieracia”, tel comun de Sèn Jan (211.389,29 euro de contribut su na soma de projet de 311.500 euro).

– La realisazion de nices neves per la cortina de Telve. Vegnarà donca enjignà n secondo bloch de nices alò da la cortina de comun, ajache ades resta demò 10 nices desponiboles su 180 fates sù ti prumes egn del 2000 per la urnes di morc (55.609,59 euro de contribut su na soma de pojet de 81.126,47 euro).

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)