Home Rubriche Notizie Ladine MENDRANZES LINGUISTICHES, L PROJET ECCA GE DÈSC LÈRGA AI JOEGN

MENDRANZES LINGUISTICHES, L PROJET ECCA GE DÈSC LÈRGA AI JOEGN

110

onferenza che sera sù la scomenzadiva europeèna col Trentin Capogrop. La Provinzia: scola e ensegnanc, na pèrt zentrèla
Cinch regions europeènes olache l’é mendranzes linguistiches, trei universitèdes, vint scoles e passa cent joegn touc ite.
Chisc l’é i numeres del projet ECCA – European Charter Classroom Activities, scomenzadiva con a cef l Comun General de Fascia, metuda a jir per lurèr fora meterièi didatics ouc a la promozion di lengac regionèi e de mendranza. Endèna l’ùltima conferenza, che la é stata en vender al 1m de otober te Provinzia autonoma de Trent aló dal Ciastel del Buonconsiglio, se à rejonà del lurier fat enscin ades e de co jir inant. Una de la proponetes l’é, per ejempie, chela de meter a la leta semper più meterièi en cont di deric linguistics de la mendrandes, e de smaorèr la rei di studenc, scoles e universitèdes che tol pèrt. Te la scontrèda se à donca rejonà soraldut de la pèrt de relief che à la formazion, dassen emportanta per ge passèr l patrimonie linguistich e culturèl a la neva generazions. Ence l sorastant del Partiment istruzion de la Provinzia Roberto Ceccato, l’à sotrissà l’emportanza de l’argoment en costion e l’à portà l messaje de l’assessor provinzièl per l’istruzion e i joegn. L’autonomia medema, l’à prezisà, la se basa su la prejenza tel Trentin de la trei mendranzes linguistiches, ladina, mochena e zimbra. La Provinzia l’à donca dezidù de tor pèrt a chesta scomenzadiva, per ge dèr valor a chest patrimonie linguistich a na vida originèla e neva, co la scola desche protagonista e colaboran co l’autra comunitèdes linguistiches.
N pensier tout sù ence dai joegn. “L ladin l’é stèr adum, spartir coi etres, partezipazion, l’é pèrt de nos” l’é l messaje di studenc fascegn che à tout pèrt al contest video delaìte de Ecca: “De gra al projet, zacan l’é stat dat lèrga a nos joegn. A chesta vida se ge dèsc vèlch da nef al patrimonie linguistich e se pel tor sù neves ponc de veduda”.
L projet Ecca l’é pontà via d’uton del 2019 tel chèder de la scomenzadives cofinanzièdes da NPLD-Network to Promote Linguistic Diversity, rei europeèna che laora tel ciamp de la politica linguistica. Obietif de la Rei – a chela che tol pèrt ladins, mochegn e zimbres desche raprejentanc de la Provinzia automoma de Trent, che fèsc pèrt de la rei tras l Servije mendranzes linguistiches e audit european – l’é chel de tegnir sù, a livel european, la promozion de la desvalivanza linguistica.

L fin de la scomenzadiva l’é stat chel de meter a jir na lingia de scomenzadives scolastiches lurèdes fora su la basa de la Chèrta Europeèna per i lengac regionèi e de mendranza, tolan ite sacotanta regions olache l’é mendranzes linguistiches (estra che l Trentin, l Friul, la Frisia, la comunanza Valenziana e la Romania) ge dajan ai dozenc l met de se confrontèr e de endrezèr materièi didatics. Al projet, che aboncont l jirà inant, tol pèrt la scoles e i studenc, ma ence l’università e partner istituzionèi, che endreza materièi didatics e academics aldò.

A la conferenza, te la “Sala delle Marangonerie” à tout pèrt ence l Conseier Provinzièl Ladin, l Vizepresident ladin del Consei Provinzièl, l Procurador del Comun general de Fascia e la ex Procuradora e ades Senatora.

L sit del projet Ecca: https://thisismylanguage.eu

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)